圖片來源於 Talisker JP official website
嚟啦嚟啦，重口味嘅小酒鬼，日日都問我哋幾時唔好再咁花花世界，成日都推埋啲又花香又甜嘅威士忌。平時會食重口味嘢食送酒嘅小酒鬼，係飲我哋介紹嘅 whisky 又無嘢好送，可能會覺得我哋當咗你哋死嘅。嗱嗱嗱，唔準你咁諗啊，我哋只係想好似食緊嗰啲噢媽家姐咁，由淡味去到濃味咁去推介比大家去試吓。你一開始就飲重煙燻、重泥煤，咁點會試我哋之前介紹嘅酒呀！
而今日我哋就開始介紹，重口味威士忌嘅最入門級，Talisker 10！
你實會覺得我哋只係介紹艾雷島最出名嗰幾間酒廠，但係你要知道， 佢哋每一間酒廠都擁有好耐嘅歷史， 正正因為咁令到佢哋嘅味道未必咁易接受。 但係呢一支Talisker 10， 會係未試過咁重口味嘅你必揀嘅入門級首選。作為蘇格蘭海島入面最出名之一嘅酒廠， 佢可以話係第一支唔係咁易飲得落嘅酒，當你睇住嚟緊嘅酒評，你只會好奇點解支酒你又會飲得落。
產地：Skye蘇格蘭
酒齡：10 yo
熟成桶：American oak casks
濃度：45.8% alc
容量：700 m
價格都幾平，入門重口味好抵。
雖然好唔公平，但係因為小編係重口味推廣家，一定比滿分。
BarLun評價
首先你會聞到一大陣海風嘅味道，又鹹又腥，然後飲落去就係一個煙燻西班牙香腸嘅味。你可能咁樣覺得係有好多香料味，但係你要知道香料唔係西班牙香腸嘅重點，而係嗰陣濃厚嘅油脂感，再加上泥煤同有煙燻嘅鹹味，令你覺得飲兩啖就夠啦。但係每一啖都比到一個好大嘅滿足感。
建議飲法
Neat with water ：一杯 neat，一杯水，分開飲，頂唔到 neat 嗰陣味先飲水。如果你咁鍾意重口味就唔建議溝落去，但係你想清爽就用兩份 whisky 溝一份水，個果香就會係返到。
配重口味嘅小炒（咩發嗰個黑椒薯仔牛柳粒），或者配熟食街市嘅是但一道菜都係一流。
其他網站評價
聞落去，除咗有好明顯嘅Smokiness之外 仲有蘋果皮同其他水果嘅味道，飲落去就係非常smokey，都有鹹同香料，個味道好balance。（但係小編飲唔出balance，只係飲得出challenge，同埋嗰香料味小編係唔係幾飲得出，我是咪飲醉左？）
小結
唔準唔試，真係好得意。
認真講句， 飲完呢一支之後你分分鐘可能返唔到轉頭。 或者你可能覺得飲重口味威士忌嘅人， 有咩可能會鍾意呢一種唔係食物嘅味道。作為一個資深（26年）重口味嘅人類，開發新嘅口味，就係你未來成為重口味小酒鬼嘅第一步。